ଭାରତ-ଚୀନ୍-ରୁଷିଆ ପୁଣି ଏକାଠି ହେବେ!
ଭାରତ-ଚୀନ୍-ରୁଷିଆ ପୁଣି ଏକାଠି ହେବେ!
ଆମେରିକା ଭାରତକୁ ଚେତାବନୀ ଦେଇଛି ଯେ, ଯଦି ଋଷିଆରୁ ତେଲ, ଗ୍ୟାସ କିମ୍ବା ପେଟ୍ରୋକେମିକାଲ୍ସ କିଣିବା ଜାରି ରୁହେ, ତେବେ ଭାରତ ଉପରେ ୫୦୦% ଶୁଳ୍କ ଲାଗୁ କରାଯିବ। ସିନେଟର ରିଚାର୍ଡ ବ୍ଲୁମେନ୍ଥଲ ୟୁକ୍ରେନରେ ଏହି ବିବୃତି ଦେଇଛନ୍ତି
ୱାଶିଂଟନ/ନୂଆଦିଲ୍ଲୀ ୦୧-୦୬-୨୦୨୫(ଏସ .ଏମ ) : ଏବେ ଆମେରିକା ପାଖରେ ଥିବା ସବୁଠାରୁ ବଡ଼ ଅସ୍ତ୍ର ହେଉଛି ଶୁଳ୍କ, ଯାହା ମାଧ୍ୟମରେ ସେ ଅନ୍ୟ ଦେଶମାନଙ୍କୁ ଧମକ ଦେଉଛି। ଆମେରିକା ଏବେ ଭାରତକୁ କଡ଼ା ଚେତାବନୀ ଦେଇଛି। ଆମେରିକା କହିଛି ଯେ, ଯଦି ଭାରତ ରୁଷିଆରୁ ଅଶୋଧିତ ତୈଳ, ଗ୍ୟାସ୍ କିମ୍ବା ପେଟ୍ରୋକେମିକାଲ୍ସ କିଣିବା ଜାରି ରଖେ, ତେବେ ଏହା ଉପରେ ୫୦୦% ଶୁଳ୍କ ଲାଗୁ କରାଯିବା ଉଚିତ୍। ୟୁକ୍ରେନର ରାଜଧାନୀ କିଭ୍ରେ ଆମେରିକୀୟ ସେନେଟର ରିଚାର୍ଡ ବ୍ଲୁମେନ୍ଥଲ ଏହା କହିଛନ୍ତି।ଭାରତ ଏବଂ ଚୀନ୍କୁ ଟାର୍ଗେଟ କରି ସେ କହିଛନ୍ତି, ରୁଷିଆରୁ ଅଶୋଧିତ ତୈଳ, ଗ୍ୟାସ୍ ଏବଂ ପେଟ୍ରୋକେମିକାଲ୍ସ କିଣୁଥିବା ଯେକୌଣସି ଦେଶ ଉପରେ ୫୦୦ ପ୍ରତିଶତ ଶୁଳ୍କ ଲାଗୁ କରାଯିବା ଉଚିତ୍। ଭାରତ ଏବଂ ଚୀନ୍ ଉପରେ ୫୦୦ ପ୍ରତିଶତ ଶୁଳ୍କ ଲାଗୁ କରାଯିବା ଜରୁରୀ। ଉଭୟ ଦେଶ ରୁଷିଆର ୭୦% ଅଶୋଧିତ ତୈଳ କିଣୁଛନ୍ତି।
ଆମେରିକାର ଏହି ବିବୃତି ଏପରି ଏକ ସମୟରେ ଆସିଛି ଯେତେବେଳେ ରୁଷିଆ ଭାରତ-ଚୀନ୍-ରୁଷିଆ (ଆରଆଇସି) ତ୍ରିକୋଣକୁ ପୁନର୍ବାର ଆରମ୍ଭ କରିବା ପାଇଁ ଦୃଢ଼ ସମର୍ଥନ କରିଛି।
ରୁଷିଆ ଉପରେ ଚାପ ପକାଇବା ପାଇଁ ଆମେରିକୀୟ ସାଂସଦମାନେ ଏକ ନୂତନ ବିଲ୍ ଆଣୁଛନ୍ତି, ଯେଉଁଥିରେ ରୁଷିଆରୁ ଅଶୋଧିତ ତୈଳ, ଗ୍ୟାସ୍ ଏବଂ ୟୁରାନିୟମ୍ କିଣୁଥିବା ଦେଶମାନଙ୍କ ଉପରେ ୫୦୦% ଶୁଳ୍କ ଲଗାଇବାର କଥା କୁହାଯାଇଛି। ସେନେଟର ବ୍ଲୁମେନ୍ଥଲ ଏବଂ ଲିଣ୍ଡସେ ଗ୍ରାହାମ କହିଛନ୍ତି ଯେ, ଯଦି ରୁଷିଆ ୟୁକ୍ରେନ ସହିତ ଶାନ୍ତି ଆଲୋଚନାରେ ପ୍ରବେଶ ନକରେ ତେବେ ଦଣ୍ଡ କାର୍ଯ୍ୟକାରୀ କରାଯିବ। ଏହା ଉପରେ ଆସନ୍ତା ସପ୍ତାହରେ ଆମେରିକୀୟ ସିନେଟରେ ଆଲୋଚନା ହୋଇପାରେ।
ଅନ୍ୟପକ୍ଷରେ, ରୁଷିଆ ୨୦୨୦ ଗଲୱାନ ସଂଘର୍ଷ ପରେ ଅଟକି ରହିଥିବା ଭାରତ-ଚୀନ୍-ରୁଷିଆ ତ୍ରିକୋଣ (ଆରଆଇସି)କୁ ପୁନଃଆରମ୍ଭ କରିବା ବିଷୟରେ କଥା ହୋଇଛି। ରୁଷିଆର ବୈଦେଶିକ ମନ୍ତ୍ରୀ ସେରଗେଇ ଲାଭରୋଭ କହିଛନ୍ତି, ଭାରତ ଏବଂ ଚୀନ୍ ମଧ୍ୟରେ ସୀମା ଉତ୍ତେଜନା ହ୍ରାସ ପାଇଛି, ଏବେ ଆରଆଇସି ବୈଠକ ଆରମ୍ଭ କରିବାର ସଠିକ୍ ସମୟ।
ରୁଷିଆ ଅନୁମାନ କରୁଛି, ଏହି ତ୍ରିକୋଣ ଏସିଆରେ ନିଜର ଶକ୍ତି ବୃଦ୍ଧି କରିବ ଏବଂ ଭାରତକୁ ପଶ୍ଚିମ ଦେଶମାନଙ୍କ ଶିବିରରୁ ଦୂରରେ ରଖିବ। ରୁଷିଆ ବିଶ୍ୱାସ କରେ ଯେ, ଭାରତ କ୍ୱାଡ୍ରୁ ନିଜକୁ ଦୂରେଇ ରଖିବା ଉଚିତ୍ କାରଣ ଏହା ଚୀନ୍କୁ ଘେରିବା ପାଇଁ ଉଦ୍ଦିଷ୍ଟ।
ଗୋଟିଏ ପଟେ ଆମେରିକାର ଶୁଳ୍କ ପ୍ରତି ଭୟ, ଅନ୍ୟପଟେ ରୁଷିଆର ପୁରୁଣା ବନ୍ଧୁତା। ଭାରତ ସମ୍ପୂର୍ଣ୍ଣ ଭାବରେ ପଶ୍ଚିମ ସହିତ ଯାଇପାରିବ ନାହିଁ, କିମ୍ବା ଚୀନ୍ ସହିତ ନିଜର ବିବାଦକୁ ଭୁଲିଯାଇ ଚିନ୍ତା ନକରି ଆରଆଇସିରେ ଯୋଗ ଦେଇପାରିବ ନାହିଁ ବୋଲି ବିଶେଷଜ୍ଞ ମତପୋଷଣ କରୁଛନ୍ତି। ଭାରତର ନୀତି ସର୍ବଦା ନିଜର ସ୍ୱାଧୀନତା ବଜାୟ ରଖିବା। ଆମେରିକା ଅନେକ ଥର ଚାପ ପ୍ରୟୋଗ କରିବାକୁ ଚେଷ୍ଟା କରିଛି, କିନ୍ତୁ ଭାରତ ଏହା ନଶୁଣି ରୁଷିଆଠାରୁ ଆମଦାନୀ ଜାରି ରଖିଛି ଫଳରେ ଆମେରିକାର ଚିନ୍ତା ମଧ୍ୟ ବଢୁଥିବା ବିଶେଷଜ୍ଞ ମତପୋଷଣ କରୁଛନ୍ତି।
