କୋଲକାତା ଲ’ କଲେଜ ଦୁଷ୍କର୍ମ ମାମଲା ସମ୍ପର୍କରେ ନୂଆନୂଆ ତଥ୍ୟ ସାମନାକୁ ଆସୁଛି
କୋଲକାତା ଲ’ କଲେଜ ଦୁଷ୍କର୍ମ ମାମଲା ସମ୍ପର୍କରେ ନୂଆନୂଆ ତଥ୍ୟ ସାମନାକୁ ଆସୁଛି
କ୍ୟାମେରା ଆଗରେ ଦୁଷ୍କର୍ମ କରାଯାଇଥିଲା ‘ମଙ୍ଗୋ’ ନିଶ୍ଚିତ ଥିଲା ଯେ ପୀଡ଼ିତା ପୁଲିସ ପାଖକୁ ଯିବେ ନାହିଁ
କୋଲକାତା/ଭୁବନେଶ୍ୱର ୦୪-୦୭-୨୦୨୫(ଏସ .ଏମ ) : କୋଲକାତା ଲ’ କଲେଜ ଦୁଷ୍କର୍ମ ମାମଲା ସମ୍ପର୍କରେ ନୂଆନୂଆ ତଥ୍ୟ ସାମନାକୁ ଆସୁଛି। ଏହାର ମୁଖ୍ୟ ଅଭିଯୁକ୍ତ ମନୋଜିତ ‘ମଙ୍ଗୋ’ ମିଶ୍ର ଜଣେ ଅଭ୍ୟାସଗତ ଅପରାଧୀ। ତା’ ନାମରେ ପୂର୍ବରୁ ୧୧ଟି ମାମଲା (ଅଧିକାଂଶ ମହିଳାଙ୍କୁ ହଇରାଣ କରିବା ସହ ଜଡ଼ିତ) ଥିଲେ ମଧ୍ୟ ସେ ଶାସକ ତୃଣମୂଳ କଂଗ୍ରେସ ସହ ଥିବା ସମ୍ପର୍କକୁ ବ୍ୟବହାର କରି ଜାମିନରେ ଆସି ସମାନ ପ୍ରକାର ଅପରାଧ କରିଚାଲିଥିଲା। ସେ ପୂର୍ବରୁ ପଢ଼ୁଥିବା ଲ’ କଲେଜରେ ଅସ୍ଥାୟୀ ଅଧ୍ୟାପକ ଭାବେ ଚାକିରି କରି ସେହି କଲେଜର ଝିଅମାନଙ୍କୁ ଯୌନ ନିର୍ଯାତନା ଦେଉଥିଲା।
ସେ ପୁଲିସକୁ କହିଛି ଯେ ଯୌନ ନିର୍ଯାତନା ଭିଡିଓ ଭାଇରାଲ କରିଦେବା ଧମକ ୨୪ ବର୍ଷୀୟା ପୀଡ଼ିତାଙ୍କୁ ପୁଲିସ ନିକଟକୁ ଯିବାରୁ ଅଟକାଇବ ବୋଲି ସେ ବିଶ୍ୱାସ କରୁଥିଲା। ଜୁନ୍ ୨୫ ତାରିଖ ସନ୍ଧ୍ୟାରେ ଏହି ଘଟଣା ଘଟିଥିଲା। ପୀଡ଼ିତା ତାଙ୍କ ଅଭିଯୋଗରେ କହିଛନ୍ତି ଯେ ଭୟାନକ ଅପରାଧ ପରେ ସେ ତାଙ୍କ ବାପାଙ୍କୁ ନେବାକୁ କହିଥିଲେ। ଏହାର କିଛି ସମୟ ପରେ ମନୋଜିତ୍ ଏବଂ ସହଅଭିଯୁକ୍ତ ପ୍ରମିତ୍ ମୁଖାର୍ଜୀ ଓ ଜାଏବ ଅହମଦ କ୍ୟାମ୍ପସ ଛାଡ଼ି ଚାଲିଯାଇଥିଲେ। କୋଲକାତା ପୁଲିସର ଶୀର୍ଷ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପୀଡ଼ିତା ଅଭିଯୋଗ କରିବାକୁ ଆସୁଛି କି ନା ଦେଖିବା ପାଇଁ କଲେଜଠାରୁ ପ୍ରାୟ ଏକ କିଲୋମିଟର ଦୂରରେ ଥିବା କସବା ଥାନା ଉପରେ ନଜର ରଖିବାକୁ ମନୋଜିତ୍ କିଛି ସାଙ୍ଗଙ୍କୁ କହିଥିଲା। ପରଦିନ ମନୋଜିତ୍ ଜଣେ କଲେଜ କର୍ମଚାରୀଙ୍କୁ ଫୋନ୍ କରି ପଚାରିଥିଲେ ଯେ ପୁଲିସ କ୍ୟାମ୍ପସକୁ ଆସିଛି କି? ପୁଲିସ ତାଙ୍କ ପଛରେ ପଡ଼ିଥିବା ଜାଣିବା ପରେ ସେ ତାଙ୍କ ଓକିଲ ବନ୍ଧୁ ଓ କଲେଜର ବରିଷ୍ଠ ଅଧିକାରୀଙ୍କୁ ଫୋନ୍ କରି ସାହାଯ୍ୟ ମାଗିଥିଲେ ମଧ୍ୟ କେହି ହସ୍ତକ୍ଷେପ କରି ନ ଥିଲେ। ଜୁନ୍ ୨୬ ତାରିଖ ସନ୍ଧ୍ୟାରେ କଲେଜ କ୍ୟାମ୍ପସଠାରୁ ପ୍ରାୟ ଦେଢ଼ କିଲୋମିଟର ଦୂର ବାଲିଗଞ୍ଜ ରେଳ ଷ୍ଟେସନ ନିକଟ ଫର୍ଣ୍ଣ ରୋଡରେ ମନୋଜିତ୍ ଓ ଜାଇବ ପରସ୍ପରକୁ ଭେଟିଥିଲେ। ପୁଲିସ ସେମାନଙ୍କୁ ଟ୍ରାକ୍ କରି ସେଦିନ ସନ୍ଧ୍ୟାରେ ଗିରଫ କରିଥିଲା। ପ୍ରମିତକୁ ସେଦିନ ରାତିରେ ତାଙ୍କ ଘରୁ ଗିରଫ କରାଯାଇଥିଲା।
ମିଳିଥିବା ସୂଚନା ଅନୁଯାୟୀ, ମନୋଜିତ ପୁଲିସକୁ କହିଛି ଯେ ପ୍ରମିତ ଓ ଜାଇବ ଦୁଷ୍କର୍ମର ଭିଡିଓ ସୁଟ୍ କରିଥିଲେ ଏବଂ ସେମାନେ ନିଶ୍ଚିତ ଥିଲେ ଯେ ସେମାନେ ଭିଡିଓ ଭାଇରାଲ କରିଦେବା ଭୟରେ ପୀଡ଼ିତା ପୁଲିସରେ ଅଭିଯୋଗ କରିବେ ନାହିଁ। ଅନୁସନ୍ଧାନରୁ ଏହା ମଧ୍ୟ ଜଣାପଡିଛି ଯେ ପୀଡ଼ିତା ଜଣକ କଲେଜରେ ଯୋଗ ଦେବା ଦିନଠାରୁ ମନୋଜିତର ଟାର୍ଗେଟ୍ରେ ଥିଲେ। କ୍ୟାମ୍ପସରେ ତୃଣମୂଳ କଂଗ୍ରେସ ଯୁବ ଶାଖାର ପୂର୍ବତନ ମୁଖ୍ୟ ତଥା ପୂର୍ବତନ ଛାତ୍ର ମନୋଜିତ୍ କଲେଜରେ ଚୁକ୍ତିଭିତ୍ତିକ ଅଧ୍ୟାପକ ଭାବେ ଯୋଗ ଦେଇଥିଲା। ନିଜ ସହଯୋଗୀମାନଙ୍କ ପାଖରେ ‘ମଙ୍ଗୋ’ ନାମରେ ପରିଚିତ ମନୋଜିତ୍ କ୍ୟାମ୍ପସରେ ପ୍ରଭାବ ପକାଇବା ପାଇଁ ନିଜର ରାଜନୈତିକ ସମ୍ପର୍କକୁ ବ୍ୟବହାର କରିଥିଲା।
ଜାଇବ ଓ ପ୍ରମିତ୍ ପୁଲିସକୁ କହିଛନ୍ତି ଯେ ପୀଡ଼ିତା ପୂର୍ବରୁ ମନୋଜିତଙ୍କୁ ପ୍ରତ୍ୟାଖ୍ୟାନ କରିଥିଲେ ଏବଂ ସେ ତାଙ୍କୁ ‘ଶିକ୍ଷା ଦେବାକୁ’ ଚାହୁଥିଲା। ଜୁନ୍ ୨୫ରେ ହୋଇଥିବା ଆକ୍ରମଣ ଯୋଜନା କରିବା ପୂର୍ବରୁ ସେ ତାଙ୍କୁ କଲେଜ ୟୁନିୟନର ସାଧାରଣ ସମ୍ପାଦକ ପଦ ‘ଚୂଡ଼ାନ୍ତ ଥୋପ’ ଭାବରେ ପ୍ରସ୍ତାବ ଦେଇଥିଲା। ଆଶ୍ଚର୍ଯ୍ୟର କଥା ହେଉଛି, ବର୍ଷ ବର୍ଷ ଧରି କ୍ୟାମ୍ପସରେ କୌଣସି ଆନୁଷ୍ଠାନିକ ଛାତ୍ର ସଂଗଠନ ନ ଥିଲେ ମଧ୍ୟ ଏହି ପଦବି ପ୍ରଦାନ କରାଯାଇଥିଲା। ଜାଇବ ଓ ପ୍ରମିତ କହିଛନ୍ତି ଯେ ଅପରାଧର ଅତି କମ୍ରେ ଦୁଇ ଦିନ ପୂର୍ବରୁ ମନୋଜିତ୍ ସେମାନଙ୍କୁ ଜଣାଇଥିଲେ ଯେ ପୀଡ଼ିତା କ୍ୟାମ୍ପସରେ ପରୀକ୍ଷା ଫର୍ମ ଦାଖଲ କରିବାକୁ ଆସିବେ। ସଂଧ୍ୟା ପର୍ଯ୍ୟନ୍ତ ତାଙ୍କୁ ସେଠାରେ ରଖିବାକୁ ନିର୍ଦ୍ଦେଶ ଦିଆଯାଇଥିଲା ବୋଲି ଏକ ସୂତ୍ରରୁ ପ୍ରକାଶ। ଘଟଣାସ୍ଥଳ ନିକଟରୁ ପୁଲିସକୁ ଗୁରୁତ୍ୱପୂର୍ଣ୍ଣ ପ୍ରମାଣ ମିଳିଛି। କଲେଜର ସିକ୍ୟୁରିଟି ଗାର୍ଡ ଦ୍ୱାରା ବ୍ୟବହୃତ ଏକ କୋଠରିରେ ଏହି ଦୁଷ୍କର୍ମ କରାଯାଇଥିଲା। କୋଠରିରୁ ବେଡ୍ ସିଟ୍ ଭଳି ବିଭିନ୍ନ ଜିନିଷକୁ ଫରେନସିକ୍ ପରୀକ୍ଷା ପାଇଁ ପଠାଯାଇଛି।
