ଜୟଶଙ୍କରଙ୍କ ପ୍ରଥମ ଚୀନ୍ ଗସ୍ତ
ଜୟଶଙ୍କରଙ୍କ ପ୍ରଥମ ଚୀନ୍ ଗସ୍ତ
ବିଦେଶ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଏବେ ଚୀନ୍ ଗସ୍ତରେ ଅଛନ୍ତି। ଏହି ଗସ୍ତ ଅବସରରେ ଜୟଶଙ୍କର ଚୀନ୍ ଉପରାଷ୍ଟ୍ରପତି ହାନ ଝେଙ୍ଗ ଏବଂ ବିଦେଶ ମନ୍ତ୍ରୀ ୱାଙ୍ଗ ୟିଙ୍କୁ ଭେଟିଛନ୍ତି
ନୂଆଦିଲ୍ଲୀ/ଭୁବନେଶ୍ୱର୧୫-୦୭-୨୦୨୫(ଏସ .ଏମ ) : ବିଦେଶ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଏବେ ଚୀନ୍ ଗସ୍ତରେ ଅଛନ୍ତି। ଏହି ଗସ୍ତ ଅବସରରେ ଜୟଶଙ୍କର ଚୀନ୍ ଉପରାଷ୍ଟ୍ରପତି ହାନ ଝେଙ୍ଗ ଏବଂ ବିଦେଶ ମନ୍ତ୍ରୀ ୱାଙ୍ଗ ୟିଙ୍କୁ ଭେଟିଛନ୍ତି। ଜୟଶଙ୍କର ଆଜି ତାଙ୍କ ଚୀନ୍ ପ୍ରତିପକ୍ଷ ୱାଙ୍ଗଙ୍କୁ କହିଛନ୍ତି, ଭାରତ ଏବଂ ଚୀନ୍ ସୀମା ଓ ଅନ୍ୟାନ୍ୟ ପ୍ରସଙ୍ଗଗୁଡ଼ିକର ସମାଧାନ କରି ସେମାନଙ୍କ ସମ୍ପର୍କକୁ ସ୍ୱାଭାବିକ କରିବା ପାଇଁ ଆଗକୁ ବଢ଼ିବାକୁ ପଡ଼ିବ। ସାଂଘାଇ ସହଯୋଗ ସଂଗଠନ (ଏସ୍ସିଓ)ର ବିଦେଶ ମନ୍ତ୍ରୀମାନଙ୍କ ବୈଠକରେ ଯୋଗଦେବା ପାଇଁ ଚୀନ୍ ପହଞ୍ଚିଥିବା ଜୟଶଙ୍କର କହିଛନ୍ତି, ସ୍ଥିର ଦ୍ୱିପାକ୍ଷିକ ସମ୍ପର୍କ କେବଳ ପାରସ୍ପରିକ ସମ୍ମାନ, ପାରସ୍ପରିକ ସ୍ୱାର୍ଥ ଏବଂ ପାରସ୍ପରିକ ସମ୍ବେଦନଶୀଳତା ଆଧାରରେ ଗଢ଼ା ହୋଇପାରିବ। ସୀମାପାର ଆତଙ୍କବାଦକୁ ପାକିସ୍ତାନର ସମର୍ଥନ ସମ୍ପର୍କରେ ସ୍ପଷ୍ଟ ଭାବରେ ଉଲ୍ଲେଖ କରି ଜୟଶଙ୍କର ୱାଙ୍ଗଙ୍କୁ କହିଛନ୍ତି, ଭାରତ ଆଶା କରୁଛି ଯେ ଏସ୍ସିଓ ବୈଠକରେ ‘ଆତଙ୍କବାଦ ପ୍ରତି ଶୂନ୍ୟ ସହନଶୀଳତା’ ବଜାୟ ରହିବ। ଏହା ପୂର୍ବରୁ ଜୟଶଙ୍କର ଚୀନ୍ ଉପରାଷ୍ଟ୍ରପତି ହାନ୍ ଝେଙ୍ଗଙ୍କୁ ଭେଟିଥିଲେ ଏବଂ ତାଙ୍କୁ କହିଥିଲେ ଯେ ଦ୍ୱିପାକ୍ଷିକ ସମ୍ପର୍କକୁ ସ୍ବାଭାବିକ କରାଗଲେ ଉଭୟ ଏହାର ଲାଭ ପାଇବେ। ୨୦୨୦ ଏପ୍ରିଲ-ମେ’ରେ ଭାରତ-ଚୀନ୍ ସୀମା ବିବାଦ ପାଇଁ ଦୁଇ ରାଷ୍ଟ୍ର ମଧ୍ୟରେ ସମ୍ପର୍କ ପ୍ରଭାବିତ ହେବା ପରଠାରୁ ଏହା ଜୟଶଙ୍କରଙ୍କ ପ୍ରଥମ ଚୀନ୍ ଗସ୍ତ। ଯଦିଓ ଗତ ଅକ୍ଟୋବରରେ ଉଭୟ ପକ୍ଷ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ରେ ମୁହାଁମୁହିଁ ସ୍ଥିତି ସମାପ୍ତ କରିବା ପାଇଁ ଏକ ବୁଝାମଣାରେ ପହଞ୍ଚିବା ପରଠାରୁ ସେ ବହୁପାକ୍ଷିକ କାର୍ଯ୍ୟକ୍ରମ ଅନ୍ତର୍ଗତ ସୀମାରେ ୱାଙ୍ଗଙ୍କୁ ଅନେକ ଥର ଭେଟିଛନ୍ତି।
