ଧାରା ୩୭୦ ଉଚ୍ଛେଦ ପରେ କାଶ୍ମୀରରେ ବିକାଶ ହୋଇଛି: ସଲମାନ ଖୁର୍ସିଦ
ଧାରା ୩୭୦ ଉଚ୍ଛେଦ ପରେ କାଶ୍ମୀରରେ ବିକାଶ ହୋଇଛି: ସଲମାନ ଖୁର୍ସିଦ
ମୋଦୀ ସରକାରଙ୍କୁ କଂଗ୍ରେସ ନେତା ସଲମାନ ଖୁର୍ସିଦଙ୍କ ପ୍ରଶଂସା
ନୂଆଦିଲ୍ଲୀ/ଭୁବନେଶ୍ୱର ୩୧-୦୫-୨୦୨୫(ଏସ .ଏମ ) : ‘ଅପରେସନ ସିନ୍ଦୂର’ ପରେ ଅନେକ କଂଗ୍ରେସ ନେତା କାଶ୍ମୀରକୁ ନେଇ ସେମାନଙ୍କ ଆଭିମୁଖ୍ୟ ବଦଳାଇଛନ୍ତି। କଂଗ୍ରେସର ବରିଷ୍ଠ ନେତା ସଲମାନ ଖୁର୍ସିଦ ଇଣ୍ଡୋନେସିଆ ଗସ୍ତ ସମୟରେ କହିଛନ୍ତି ଯେ, ୨୦୧୯ରେ ଭାରତୀୟ ସମ୍ବିଧାନର ଧାରା ୩୭୦ ଉଚ୍ଛେଦ ପରେ ଜମ୍ମୁ-କାଶ୍ମୀରରେ ଦୀର୍ଘଦିନ ଧରି ଚାଲିଆସୁଥିବା ବିଚ୍ଛିନ୍ନତାବାଦ ସମସ୍ୟାର ଅନ୍ତ ଘଟିଛି, ଯାହାଫଳରେ ଏହି ଅଞ୍ଚଳରେ ‘ସମୃଦ୍ଧି’ ଆସିଛି। ଧାରା ୩୭୦ ଉଚ୍ଛେଦର ସୁଫଳ ରାଜ୍ୟବାସୀଙ୍କୁ ବିକାଶର ରାସ୍ତାରେ ନେଉଛି ବୋଲି ସେ କହିଛନ୍ତି।
ବିଚ୍ଛିନ୍ନତାବାଦର ଅନ୍ତ ଘଟାଇଛନ୍ତି ସରକାର
ସର୍ବଦଳୀୟ ଭାରତୀୟ ସଂସଦୀୟ ପ୍ରତିନିଧି ଦଳରେ ଇଣ୍ଡୋନେସିଆ ଥିଙ୍କ୍ଟ୍ୟାଙ୍କ୍ ଓ ଶିକ୍ଷାବିତ୍ଙ୍କ ସହ କଥାବାର୍ତ୍ତା କରି ଖୁର୍ସିଦ କହିଛନ୍ତି, କାଶ୍ମୀରରେ ଦୀର୍ଘ ଦିନ ଧରି ଏକ ବଡ଼ ସମସ୍ୟା ରହିଥିଲା। ସମ୍ବିଧାନର ୩୭୦ ଧାରା ଦେଶର ବାକି ଅଞ୍ଚଳଠାରୁ ଏହା ଅଲଗା ବୋଲି ଧାରଣା ଦେଇଥିଲା। କିନ୍ତୁ ଅଗଷ୍ଟ ୨୦୧୯ରେ ବିଜେପି ନେତୃତ୍ୱାଧୀନ ସରକାର ଦ୍ବାରା ଧାରା ୩୭୦ର ଉଚ୍ଛେଦ ପରେ ଏହି ଧାରଣା ଦୂର ହୋଇଛି। ପରବର୍ତ୍ତୀ ସମୟରେ ୬୫ ପ୍ରତିଶତ ମତଦାନ ସହ ନିର୍ବାଚନ ହୋଇଥିଲା। କାଶ୍ମୀରରେ ଆଜି ଏକ ନିର୍ବାଚିତ ସରକାର ଅଛି। ୩୭୦ ଧାରା ଉଚ୍ଛେଦ ପରେ ଏଠାରେ ବିକାଶ ହୋଇଛି। ଖୁର୍ସିଦଙ୍କ ମନ୍ତବ୍ୟ ଧାରା ୩୭୦ ଉପରେ ତାଙ୍କର ପୂର୍ବ ଆଭିମୁଖ୍ୟଠାରୁ ଅଲଗା, ଯାହାକୁ ସେ ଜମ୍ମୁ-କାଶ୍ମୀରକୁ ଭାରତ ସହିତ ଯୋଡ଼ିବାରେ ଏକ ପ୍ରତିବନ୍ଧକ ନୁହେଁ ବୋଲି କହିଥିଲେ।ବର୍ତ୍ତମାନ ଦକ୍ଷିଣପୂର୍ବ ଏସିଆ ଗସ୍ତରେ ଥିବା ଏହି ପ୍ରତିନିଧି ଦଳରେ ବିଜେପି ସାଂସଦ ଅପରାଜିତା ଷଡ଼ଙ୍ଗୀ, ବ୍ରିଜ ଲାଲ, ପ୍ରଦାନ ବରୁଆ ଓ ହେମାଙ୍ଗ ଯୋଶୀ, ଟିଏମ୍ସିର ଅଭିଷେକ ବାନାର୍ଜୀ,ସିପିଆଇ(ଏମ୍)ର ଜନ୍ ବ୍ରିଟାସ୍ ଏବଂ ପୂର୍ବତନ ଭାରତୀୟ ରାଷ୍ଟ୍ରଦୂତ ମୋହନ କୁମାରଙ୍କ ସମେତ ବିଭିନ୍ନ ରାଜନୈତିକ ଦଳର ପ୍ରତିନିଧି ରହିଛନ୍ତି। ଇଣ୍ଡୋନେସିଆ, ମାଲେସିଆ, ଦକ୍ଷିଣ କୋରିଆ, ଜାପାନ ଓ ସିଙ୍ଗାପୁରରେ ଭାରତର ବୈଦେଶିକ ନୀତି ଆଭିମୁଖ୍ୟ ବିଷୟରେ ଅବଗତ କରାଇବା ପାଇଁ ଏହି ଗୋଷ୍ଠୀକୁ ଦାୟିତ୍ୱ ଦିଆଯାଇଛି।
