ହାଇକୋର୍ଟ ବିଚାରପତି ପଦ, ୩୬ ଜଣଙ୍କ ନାମ ସୁପାରିସ କଲେ କଲେଜିୟମ୍

ସୁପ୍ରିମ୍‌କୋର୍ଟ କଲେଜିୟମ୍ ବିଭିନ୍ନ ହାଇକୋର୍ଟରେ ବିଚାରପତି ଭାବେ ପଦୋନ୍ନତି ପାଇଁ ରେକର୍ଡ ୩୬ ଜଣଙ୍କ ନାମକୁ ମଞ୍ଜୁରି ପ୍ରଦାନ କରିଛି। ବର୍ତ୍ତମାନ କେନ୍ଦ୍ର ସରକାରଙ୍କ ଅନୁମୋଦନ ପରେ ସେମାନଙ୍କୁ ନିଯୁକ୍ତି ମିଳିବ

ନୂଆଦିଲ୍ଲୀ/ଭୁବନେଶ୍ୱର୦୫-୦୭-୨୦୨୫(ଏସ.ଏମ ) : ସୁପ୍ରିମ୍‌କୋର୍ଟ କଲେଜିୟମ୍ ବିଭିନ୍ନ ହାଇକୋର୍ଟରେ ବିଚାରପତି ଭାବେ ପଦୋନ୍ନତି ପାଇଁ ରେକର୍ଡ ୩୬ ଜଣଙ୍କ ନାମକୁ ମଞ୍ଜୁରି ପ୍ରଦାନ କରିଛି। ବର୍ତ୍ତମାନ କେନ୍ଦ୍ର ସରକାରଙ୍କ ଅନୁମୋଦନ ପରେ ସେମାନଙ୍କୁ ନିଯୁକ୍ତି ମିଳିବ। ଦିଲ୍ଲୀ, ପଞ୍ଜାବ ଓ ହରିୟାଣା, ମଧ୍ୟପ୍ରଦେଶ, ତେଲେଙ୍ଗାନା, ପାଟନା, ଆନ୍ଧ୍ରପ୍ରଦେଶ ଓ ରାଜସ୍ଥାନ ସମେତ ଅନେକ ହାଇକୋର୍ଟରେ ନିଯୁକ୍ତି ପାଇଁ ଏହି ନାମଗୁଡ଼ିକ ସୁପାରିସ କରାଯାଇଛି। ପ୍ରଧାନ ବିଚାରପତି ଜଷ୍ଟିସ ଭୂଷଣ ଆର୍ ଗୱାଇ ଏବଂ ବରିଷ୍ଠ ବିଚାରପତି ଜଷ୍ଟିସ ସୂର୍ଯ୍ୟକାନ୍ତ ଓ ବିକ୍ରମ ନାଥଙ୍କୁ ନେଇ ଗଠିତ କଲେଜିୟମ୍ ଜୁଲାଇ ୨ ଓ ୩ରେ ପ୍ରାର୍ଥୀମାନଙ୍କ ସାକ୍ଷାତ୍‌କାର ନେଇଥିଲେ। କଲେଜିୟମ୍‌ର ପ୍ରସ୍ତାବ ଅନୁଯାୟୀ ପଞ୍ଜାବ ଓ ହରିୟାଣା ଏବଂ ମଧ୍ୟପ୍ରଦେଶ ହାଇକୋର୍ଟରେ ନିଯୁକ୍ତି ପାଇଁ ୧୦ ଜଣ ଲେଖାଏଁ, ତେଲେଙ୍ଗାନା ଓ ଗୌହାଟୀ ହାଇକୋର୍ଟରେ ୪ ଜଣ ଲେଖାଏଁ, ଦିଲ୍ଲୀ ହାଇକୋର୍ଟରେ ୩ ଜଣ, ରାଜସ୍ଥାନ ଓ ପାଟନା ହାଇକୋର୍ଟରେ ୨ ଜଣ ଲେଖାଏଁ, ଆନ୍ଧ୍ରପ୍ରଦେଶ ହାଇକୋର୍ଟ ପାଇଁ ଗୋଟିଏ ନାମ ସୁପାରିସ କରାଯାଇଛି। ଜୁଲାଇ ପହିଲା ସୁଦ୍ଧା ଦେଶର ୨୫ଟି ହାଇକୋର୍ଟରେ ୧୧୨୨ଟି ମଞ୍ଜୁରୀପ୍ରାପ୍ତ ପଦବୀ ଥିବା ବେଳେ ୩୭୧ଟି ପଦବୀ ଖାଲି ପଡ଼ିଛି। ରିପୋର୍ଟ ଅନୁଯାୟୀ, ବ୍ୟକ୍ତିଗତ ସାକ୍ଷାତ୍‌କାର ଚୂଡ଼ାନ୍ତ ଚୟନକୁ ଯଥେଷ୍ଟ ପ୍ରଭାବିତ କରିଥିଲା। ଏପରି କିଛି ପ୍ରାର୍ଥୀ ଥିଲେ, ଯେଉଁମାନଙ୍କ ଫାଇଲ ବିଶେଷ ଭଲ ଦେଖାଯାଉ ନ ଥିଲା, କାରଣ ସେମାନଙ୍କ ପାଖରେ ହାଇପ୍ରୋଫାଇଲ୍ ମାମଲାର ଅଭାବ ଥିଲା କିମ୍ବା ପରାମର୍ଶଦାତା ବିଚାରପତିଙ୍କଠାରୁ ସେମାନଙ୍କ ଉପରେ ସର୍ବୋତ୍ତମ ମତାମତ ନ ଥିଲା। କିନ୍ତୁ କଥାବାର୍ତ୍ତା ସମୟରେ ସେମାନେ ନ୍ୟାୟିକ ଦୃଷ୍ଟିରୁ ତୀକ୍ଷ୍ଣ ଓ ନୈତିକ ଦୃଷ୍ଟିରୁ ଦୃଢ଼ ବୋଲି ଜଣାପଡ଼ିଥିଲେ। ଗୁରୁତ୍ୱପୂର୍ଣ୍ଣ କଥା ହେଉଛି, ସୁପ୍ରିମ୍‌କୋର୍ଟର ପାରମ୍ପରିକ ଗ୍ରୀଷ୍ମଛୁଟି ସମୟରେ ସାକ୍ଷାତ୍‌କାର ନିଆଯାଇଥିଲା, ଯାହାକୁ ବର୍ତ୍ତମାନ ‘ଆଂଶିକ କାର୍ଯ୍ୟ ଦିବସ’ ଭାବରେ ବର୍ଗୀକୃତ କରାଯାଇଛି। ଗତବର୍ଷ ଶେଷ ଆଡ଼କୁ ତତ୍କାଳୀନ ପ୍ରଧାନ ବିଚାରପତି ସଞ୍ଜୀବ ଖାନ୍ନାଙ୍କ ନେତୃତ୍ୱାଧୀନ କଲେଜିୟମ୍ ପ୍ରାର୍ଥୀଙ୍କ ବ୍ୟକ୍ତିଗତ ସାକ୍ଷାତ୍‌କାର ପ୍ରଥାକୁ ପୁନର୍ଜୀବିତ କରିବା ପରେ ଏହି ସଦ୍ୟତମ ପଦକ୍ଷେପ ନିଆଯାଇଛି।